പൊന്നാനി : പി സി ഡബ്ല്യു എഫ് ട്രഷററായിരുന്ന എ കെ മുസ്തഫയുടെ സ്മരണക്കായി നൽകി വരുന്ന എ കെ മുസ്തഫ സാമൂഹ്യ സേവന പ്രതിഭാ പുരസ്കാരം എക്സ് എം പി സി ഹരിദാസും, കർമ്മ ബഷീറും പങ്കിട്ടു. ഈരണ്ട് വർഷം കൂടുമ്പോൾ നൽകി വരുന്ന അവാർഡ് ഇത് രണ്ടാമത്തേതാണ്. പ്രഥമ പുരസ്കാരം നജീബ് കുറ്റിപ്പുറത്തിനായിരുന്നു. പ്രൊഫ : വികെ ബേബി, കെ വി നദീർ ,ഷാജിഹനീഫ് എന്നിവരായിരുന്നു ജൂറി അംഗങ്ങൾ. സാമൂഹ്യ ജീർണ്ണതകൾക്കെതിരെ നിരന്തരപോരാട്ടം നടത്തിയും, വർഗ്ഗീയതക്കെതിരെ ഉറച്ച നിലപാട് സ്വീകരിച്ച് മതേതരത്വം ഉയർത്തിപ്പിടിക്കുകയും , കക്ഷിരാഷ്ട്രീയ ബന്ധങ്ങൾക്കപ്പുറത്ത് ഏവരെയും ചേർത്ത് പിടിച്ച് പ്രായംതീർത്ത അവശത മറന്ന് പൊതു പ്രവര്‍ത്തനരംഗത്ത് നിറഞ്ഞു നില്‍ക്കുകയും ചെയ്യുന്ന സേവനങ്ങൾ മാനിച്ചാണ് സി ഹരിദാസിനെ അവാർഡിനായി തെരഞ്ഞെടുത്തത്. പൊന്നാനിയുടെ വികസന കുതിപ്പിന് ആക്കം കൂട്ടുന്ന കർമ്മ റോഡ് സംവിധാനത്തിന് നേതൃത്വം നല്‍കിയതും, ജീവകാരുണ്യ പ്രവര്‍ത്തനങ്ങളും, ലഹരിക്കെതിരെയുളള മുന്നേറ്റങ്ങളുമാണ് കർമ്മ ബഷീറിനെ അവാർഡിനായി പരിഗണിച്ചത്. എം ഇ എസ് കോളേജിലെ ഒ കെ ഉമർ നഗറിൽ നടന്ന പി സി ഡബ്ല്യു എഫ് വനിതാ എട്ടാം വാർഷിക പൊതു സമ്മേളന വേദിയിൽ വെച്ചാണ് അവാർഡ് കൈമാറിയത്. 10001 രുപ ക്യാഷ് അവാർഡ്, ഉപഹാരം , പ്രശസ്തി പത്രം എന്നിവയാണ് നൽകിയത്. നഗരസഭ ചെയർമാൻ ശിവദാസ് ആറ്റുപുറം ഇരുവർക്കും അവാർഡ് സമ്മാനിച്ചു. സാമൂഹ്യ പ്രവർത്തക നർഗീസ് ബീഗം മുഖ്യാതിഥിയായിരുന്നു. സുബൈദ പോത്തനൂർ അധ്യക്ഷത വഹിച്ചു. ഡോ : അബ്ദുറഹ്മാൻ കുട്ടി എ കെ മുസ്തഫ അനുസ്മരണ പ്രഭാഷണം നടത്തി. പ്രൊഫ : ഇമ്പിച്ചിക്കോയ , അടാട്ട് വാസുദേവൻ മാസ്റ്റർ, യു എം ഇബ്രാഹിം കുട്ടി മാസ്റ്റർ, സലീം കളക്കര (സഊദി) സന്ദീപ് കൃഷ്ണ (യു.എ.ഇ) സൈനുൽ ആബിദ് (ഖത്തർ) സാദിഖ് (ഒമാൻ) ടി ടി നാസർ (കുവൈറ്റ്) രാജൻ തലക്കാട്ട്, അബ്ദുല്ലത്തീഫ് കളക്കര,പ്രണവം പ്രസാദ്,സി സി മൂസ്സ, മുസ്തഫയുടെ കുടുംബാംഗങ്ങൾ തുടങ്ങിയവർ സംബന്ധിച്ചു. ആരിഫ മാറഞ്ചേരി സ്വാഗതവും, ടി വി സുബൈർ നന്ദിയും പറഞ്ഞു.
